السلام عليكم ورحمه الله وبركاته
حكايات شلبي ........ وشلبية
يلا نشوف
تذكرت ليلى و السنين الخواليـا و لأيام لا نخشى على اللهو ناهيـا
فليت ركاب القوم لم تقطع الغضا و ليت الغضا ماشى الركاب لياليـا
و قد يجمـع الله الشتيتين بعدما يظنـان كل الظـن: أن لا تلاقيــا
شلبي : يا سلام عليك يا ابن الملوح ... وانت يا شلبي اللي واقع يعني من قعر الأوفة ؟؟؟ ماحنا كمان بنعرف نقول أحسن من كده ... بس هي فين ليلى اللي تطلع
اللي جوايا ؟؟ فين الملهمة اللي تحرك ابداعي ؟؟؟ ..... أرزاق ، يا تنانيلة في حظنا
الهباب !!!
>>>>>>>
>>>>>>>
شلبية : ممكن لو سمحت أستعير قلم حضرتك أصل قلمي طرش ؟؟؟
شلبي : طبعا يا آنسة بكل سرور وحبور اتفضلي قلم بنور .
شلبية : ميرسي خالص .
شلبي : مالك يا واد يا شلبي ؟؟؟ أيه اللي حصلك ؟؟؟ قلبك عمال يدق بسرعة زي جرس الفسحة ... أيه ده ؟؟؟ !!!! ... بدأ يطلع الابداع ... حاسس بدوخة وغثيان وعايز أرجع قصيدة ... هي دي ملهمتك يا واد .... هذه ليلتي .
شلبي : هي المكتبة فاضية انهاردة يا آنسة والا أنا بيتهيألي ؟؟؟
شلبية : " شور "... علشان المظاهرات اللي الطلبة عاملينها في الجامعة .... انت مالكش في " المود " ده ؟؟؟
شلبي : انا كفاحي مع الكلمة ... في عقر دارها ... في الكتاب .
شلبية : " واو "... واضح جدا انك انسان مثقف وبتحب القراء ة زيي .
شلبي : بس أنا أول مرة أشوفك هنا في المكتبة .
شلبية : " وي " .... أنا فعلا أول مرة أدخل المكتبة دي ... لأن في مكتبة عامة جنب بيتناباقضي وقتي كله فيها .
شلبي : اسمه أيه الكتاب اللي معاكي ده ؟؟؟
شلبية : ده كتاب فن الطهي للشيف رمزي .... بس بانقل منه بعض الوصفات ، علشان عيد ميلادي انهاردة .
شلبي : كل سنة وانتي طيبة ... تسمحي تقبلي هدية بسيطة مني بمناسبة عيد ميلادك ؟؟؟... دي قصيدة كتبتها وعزيزة جدا علي بعنوان " أحلام الكوز المخروم "
شلبية : عال عال عال ، متشكرة قوي ... كلماتها جميلة وانت انسان رقيق جدا .
شلبي : وانتي انسانة رقيقة قوي .... ممكن أتعرف على اسمك ؟؟؟
شلبية : اسمي شوشو .
شلبي : اسم فعلا رقيق ... مليان بالغموض ، زي بلح الشام .
شلبية : أصل احنا لنا جذور شامية .
شلبي : واضح جدا من ملامحك .... العيون الخضر لون غصن البرسيم ، والأسنان المتفلجة مثل حبات الذرة ....
شلبية : " ريلي " ؟؟؟ !!! واضح انك شاعر .... أنا كمان باعشق الشعر .
شلبي : رائع ... يا ترى ليكي ابداعات وتجارب شعرية ؟؟؟
شلبية : كان لي محاولات كتبتها ... بس أختي الصغيرة قطعتها .
شلبي : يا خسارة كان نفسي أقرأ ابداعاتك .
شلبية : بس أنا باحب القراءة أكثر من الكتابة .
شلبي : أنا سعيد جدا اني اتعرفت عليكي ، واضح ان طباعنا وميولنا واحدة .
شلبية : ميرسي .
>>>>>>>>>>>
>>>>>>>>>>>
شلبي : مبروك كتب الكتاب يا حبيبتي وبالمناسبة السعيد ةدي أنا عامل لك مفاجأة !!!
شلبية : ميرسي يا حبيبي .... مفاجأة أيه ؟؟؟؟
شلبي : تذكرتين
شلبية : " واو " ... سينما ولا مسرح ؟؟؟
شلبي : لالالالالالا .... أكثر .... معرض الكتااااااااااا ااااااااااااااا ااااااااااااااا ااااااااااااااب !!!
شلبية: الكتاب ..... كتاب أيه يا حبيبي ؟؟؟
شلبي : معرض القاهرة الدولي للكتاب... انتي ازاي مش عارفة انه بدأ ... ده أنا باستناه من السنة للسنة .
شلبية : عال عال عال ، بالعكس يا حبيبي .... دا أنا اللي كنت هاعملهالك مفاجأة وأعزمك ... بس انت اللي حرقتها .
>>>>>>>>>>
>>>>>>>>>>
شلبي : أنا هابدأ من قسم القصص والروايات العالمية ، أيه رأيك ؟؟؟
شلبية : عال عال عال ... وأنا كمان باحب الروايات العالمية .
شلبي : ياسلام ... "مرتفعات وذرنج " لـ " ايميلي برونتي " .
شلبية : عال عال عال ... دا أنا كان نفسي أقرأها من زمان .
شلبي : يااااااااه يا شوشو .... نادر جدا لما بيت واحد يطلع منه اخوا ت مبدعين " تشارلوت وأختها ايميلي " .
شلبية : عال عال عال .... فعلا صدفة غريبة ، بعد اذنك يا حبيبي ... ممكن أطلع بره في الهواشوية لحسن حاسة اني مخنوقة وعندي كرشة نفس ، وخايفة أفطس .
شلبي : سلامتك يا حبيبتي ... نروح أحسن لأني بدأت أقلق عليكي .
شلبية : أيوه والله أحسن ... الله ينور عليك ... بس مش عايزه أحرمك من متعة المعرض .
شلبي : بسيطة يا حبيبتي ... هنيجي بكرة تاني .
شلبية : لالالالا ... حرام عليك ..... أقصد حرام عليك تحرم نفسك علشاني ، خليك انت هنا وانا أروح لوحدي .
شلبي : ياخسارة .... هتفوتك الأمسية الشعرية ، بس ولا يهمك أنا هاسجلها لك .
شلبية : مفييش داعي يا حبيبي ... أنا عارفة اللي هيقولوه فيها .
>>>>>>>>>>
>>>>>>>>>>
شلبي : أيه رأيك في الأدب الرمزي ؟؟؟
شلبية : الأدب مطلوب في كل حاجة يا حبيبي خصوصا في اللبس لأن ده رمز .
شلبي : مش فاهم قصدك !!!
شلبية : هههههه ... عال عال عال ، ماتيجي نتمشى شوية لحسن تعبت من القاعدة ، و حاسةاني مخنوقة وعندي كرشة نفس ، وخايفة أفطس .
شلبي : أول محاولة لي في كتابة القصة كانت وأنا في الابتدائي .
شلبية : عال عال عال .... يعني موهوب من صغرك . أنا كمان كنت الأولى في مادة التعبير في الفصل ، وكان أصحابي بيسموني " شوشو النرجسية " .
شلبي : وفي الكلية طلعت أول الجمهورية في مسابقة الكتابة ، والوزير هو اللي سلمني الجائزة بنفسه .
شلبية : عال عال عال ... والجائزة كانت كام ؟؟؟
شلبي : 150 جنيه .
شلبية : عال عال عال .... والوزير سلمها لك ازاي : تحويل رصيد على الموبيل .
شلبي : العبرة مش في قيمة الجائزة ... العبرة في التقدير .
شلبية : عال عال عال .... أنا فخورة بيك وبثقافتك الأدبية يا شلبي .
شلبي : سمعتي سيمفونيات بيتهوفن و موزرت ؟؟؟
شلبية : رائحته حلوه خالص " البارفيوم " اللي انت حاطه يا حبيبي .
شلبي : غريبة .... مع اني ما استعملتش بارفيوم من اسبوع .
شلبية : ..... يبقى فيه حد غريب هنا !!! ..... ههههه .
شلبي : دمك خفيف قوي يا شوشو .
شلبية : كل أصحابي بيقولوا كده ... ان روحي مرحة ودمي خفيف ونكتيه .
>>>>>>>>>>
>>>>>>>>>>
شلبي : أنا مش مصدق نفسي يا شوشو اننا اتزوجنا وأخيرا في عش الزوجية .
شلبية : ليه مش مصدق يعني ... كنت فاكر اني هازحلقك ولا هاديك بمبة واتجوز واحد تاني ولا أيه يعني ؟؟؟
شلبي : نعم ؟؟؟ !!! ..... هازحلقك ؟؟؟!!! .... بمبة ؟؟؟!!! ..... أيه الألفاظ الغريبة دي !!!
شلبية : ماتدقش في الكلام .... خليك واد روش و خلي البساط أحمدي .
شلبي : طيب خليني أقرأ لك القصيدة اللي أنا كتبتها للمناسبة السعيدة دي .
شلبية : لا ياعم .... أبوس مفاصلك ... العملية مش ناقصة وجع دماغ ... كفاية صداع الفرح .
شلبي : عم !!! .... مفاصل !!! ..... دماغ !!! .... صداع !!! .... أحمدك يا رب ... انتي أكيد بتهزري .
شلبية : ليه هو انت شايفني لابسة بالياتشوا ولا عاملة أرجوز .
>>>>>>>>>>
>>>>>>>>>>
شلبية : مالقيتش العدسات الخضراء بتاعتي ... أنا لسه خلعاها حالا هنا ؟؟؟!!!
شلبي : هي مش خضراء طبيعية ؟؟؟!!!
شلبية : وانت مالك طبيعية ولا صناعية ؟؟؟
شلبي : بس ده تزوير في عيون رسمية .
شلبية : سيبك من الخيابة دي وقول ليه : أيه الريحة البايخة ديه ؟؟؟!!! ... انت كابب على نفسك زيت حار ولا واكل طعميه ؟؟؟
شلبي : ده نفس البرفيوم اللي قبل الجواز كنتي بتقولي عليه قمة الرومانسية .
>>>>>>>>>
>>>>>>>>>
شلبية : هلوا شلبي .... كيس أيه اللي في أيدك ده ؟؟؟
شلبي : حزري فزري ؟؟؟
شلبية : مابلاش لعب العيال ده ، وخش في الموضوع .
شلبي : لعب عيال ؟؟؟ .... أنا بس كنت عاملها لك مفاجأة .
شلبية : أوعى تكون حركة من الحركات الهبلة بتاعة أيام كتب الكتاب ومعرض الكتاب .
شلبي : انتي بتسميها دلوقتي حركات هبلة ؟؟؟!!!
شلبية : أوعى يكون كتاب .
شلبي : فعلا كتاب .
شلبية : يا ما جاب الغراب لأمه ... جاب لها كتاب في كومه ، يا دي الاكتئاب ، كنت فاكراه كباب ، مش هايدخل من الباب .
شلبي : دي العيشة بقت هباب .
شلبية : يا أنا يالكتاب ...
شلبي : طبعا الكتاب ...... وألف جمل يفوته الباب .
قصر الكلام ..... الدور اللي هتمثليه مش هتقدري تعيشي فيه .
ودمتم اعزائى بالف خير
الثلاثاء ديسمبر 01, 2009 7:23 pm
